Mikilvægi hollrar næringar fyrir börn yfir sumartímann

Mikilvægi hollrar næringar fyrir börn yfir sumartímann

Sumarið er tími ævintýra, útiveru og fjölbreytilegra daga – en einnig tími þar sem reglulegir matmálstímar og matarvenjur geta raskast. Börn eru í stöðugum vexti og þroska og því skiptir höfuðmáli að huga að hollri og næringarríkri fæðu, jafnvel þegar dagarnir eru óreglulegir og fjölskyldan á faraldsfæti.

Þegar börn eyða meiri tíma úti við leiki og ferðalög eykst orkuþörf þeirra. Því er gott að vera viðbúin með hollt nesti og næringarríkt snarl sem auðvelt er að grípa í. Ávextir, grænmeti, hnetur og ósykrað skyr eða jógúrt eru dæmi um frábæra valkosti sem bæði næra og gefa orku fyrir daginn.

Góðar matarvenjur - líka á sumrin

Það eru ekki aðeins fæðutegundirnar sem skipta máli, heldur einnig hvernig við nálgumst matartímann. Sumarið býður upp á dýrmæt tækifæri til að skapa jákvæða upplifun í kringum mat. Hvettu börnin til að taka þátt í eldamennsku, leggja á borð eða skera niður grænmeti. Slík samvera styrkir ekki aðeins tengslin heldur kennir börnunum mikilvægi fjölbreyttrar og hollrar fæðu. Að leyfa börnum að skammta sér sjálf getur einnig aukið áhuga þeirra á matnum og gert þau opnari fyrir því að smakka nýjar fæðutegundir.

Hollari kostur á ferð og flugi

Í hraða daglegs lífs, sérstaklega yfir sumartímann, getur verið freistandi að grípa í fljótlegan og oft óhollari kost. En með smá fyrirhyggju er auðvelt að bjóða börnunum upp á næringarríkan valkost:

• Grænmeti og ávextir með öllum máltíðum og sem millibita.
• Heilkornavörur í stað fínunninna vara.
• Skyr og jógúrt
• Vatn sem helsti drykkurinn.
• Hnetur, fræ eða ávaxtasnakk í stað sælgætis eða kex.

Samvera og jákvæð upplifun við matarborðið

Matartíminn er meira en næring – hann er líka stund fyrir fjölskylduna til að slaka á saman og ræða daginn. Leggjum símana frá okkur og njótum þess að borða saman þegar tækifæri gefst.

Munum að góðar matarvenjur og jákvæð tengsl við mat mótast snemma og fylgja börnunum alla ævi. Með því að huga að næringu og samveru, jafnvel þegar dagarnir eru óreglulegir, leggjum við grunn að betri heilsu og vellíðan fyrir börnin okkar.

Gleðilegt og næringarríkt sumar!