15. janúar 2026
Hollusta og fjölbreytni á diskinn
Hollusta og fjölbreytni á diskinn
Við hjá Skólamat leggjum mikinn metnað í að bjóða upp á máltíðir sem styðja við vöxt og þroska barna. Við fylgjum ráðleggingum Embættis landlæknis um fjölbreytt og hollt mataræði til að tryggja að nemendur fái þá næringu sem þeir þurfa á að halda yfir skóladaginn.
Af hverju skiptir fjölbreytnin máli?
Líkaminn þarf fjölbreytt næringarefni til að starfa sem best. Hér að neðan eru nokkrir þættir sem við leggjum áherslu á við matreiðsluna:
- Grænmeti og ávextir: Eru stútfullir af bæði vítamínum og steinefnum en einnig trefjum sem gera meltingunni gott. Við mælum með því að grænmeti eða ávextir skipi um þriðjung á hverjum matardiski.
- Fiskur í hverri viku: Fiskur er frábær uppspretta próteina, selens og joðs. Feitur fiskur gefur okkur auk þess D-vítamín og ómega-3 fitusýrur sem eru nauðsynlegar fyrir hjartað og almenna vellíðan.
- Heilkorn og trefjar: Við nýtum heilkornavörur þar sem allir hlutar kornsins eru notaðir, það veitir langvarandi orku og bætir meltingu.
- Val um aðalrétt: Við bjóðum daglega upp á tvo aðalrétti, annar þeirra inniheldur alltaf kjöt eða fisk en hinn rétturinn er vegan.
Hollusta er líka skemmtileg!
Það er mikilvægt að börn kynnist hollum matarvenjum snemma, bæði í skólanum og heima. Til að gera grænmetisátið meira spennandi eru hér nokkrar skemmtilegar staðreyndir sem þið getið rætt við matarborðið:
Vissir þú að...
- Það getur tekið ananas allt að tvö ár að vaxa áður en hann er tilbúinn til uppskeru?
- Vatnsmelónur eru 92% vatn? Það gerir þær að frábærri leið til að svala þorsta.
- Gulrætur voru upphaflega fjólubláar? Hollenskir ræktendur fóru að rækta appelsínugular gulrætur á 17. öld til heiðurs konungsfjölskyldunni þar en appelsínugulur er litur hollensku konungsfjölskyldunnar.
- Epli fljóta í vatni vegna þess að 25% af rúmmáli þeirra er loft?
Með því að velja næringarríkan mat stuðlum við saman að bættri heilsu og meiri orku fyrir krakkana okkar í námi og leik.