Algengi fæðuofnæmis meðal barna er gjarnan talin vera á bilinu 2-5% en meðal fullorðinna 1-2% og er helsta ástæða lægri tíðni fæðuofnæmis hjá fullorðnum tengd því að margir yfirvinna fæðuofnæmi gagnvart mjólk og eggjum sem eru helstu fæðuofnæmisvaldar barna. Greint er frá hluta niðurstaðna alþjóðlegrar rannsóknar (EuroPrevall-rannsóknin) á fæðuofnæmi barna í nýjasta hefti Læknablaðsins.

Börnum (fjöldi: 1341) var fylgt eftir frá því þau fæddust og þar til þau náðu eins árs aldri. Af 1341 barni var staðfest fæðuofnæmi hjá 25 þeirra eða 1,86%.  “Algengi ofnæmis fyrir eggjum var 1,42%; mjólk 0,52%; fiski 0,22%; hveiti 0,15%; jarðhnetum 0,15% og soja 0,07%.” Hafa ber í huga að hér er eingöngu verið að fjalla um fæðuofnæmi barna á fyrsta ári og er líklegt að tíðnin fari hækkandi þegar börnin eldast þar sem “algengi ofnæmissjúkdóma eykst fyrstu ár ævinnar”.

Sá þáttur sem virðist hafa vakið mestan áhuga fjölmiðla tengist þeirri niðurstöðu að “lýsisneysla daglega eða oft í viku minnkaði tilhneigingu til næmingar fyrir fæðu” en bæta má við að samkvæmt rannsókninni þá jók lýsisneysla hins vegar tilhneigingu til astma, sem er nokkuð sem ekki hefur farið hátt í fjölmiðlum!

Algengi fæðuofnæmis hjá íslenskum börnum á fyrsta ári Harpa Kristinsdóttir, Michael Clausen, Hildur S. Ragnarsdóttir, Ingibjörg H. Halldórsdóttir, Doreen McBride, Kirsten Beyer, Sigurveig Þ. Sigurðardóttir. http://www.laeknabladid.is/

Ólafur Sæmundsson, næringarfræðingur