Mikilvægi heilbrigðs lífernis

Það að tileinka sér heilbrigðan lífsstíl er ekki einungis gott fyrir líkamlega heilsu heldur eykur það einnig vellíðan og ánægju! Er þetta eitthvað sem þú hefur áhuga á? Veistu hvað gerist ef þú eða fjölskyldumeðlimir þínir fara að neyta hollrar fæðu, hreyfa sig reglulega og tileinka sér nægan svefn?

Hreyfing fyrir fullorðna á að vera lámark 30 mínútur daglega en fyrir börn og unglinga er ráðlagt að hreyfing sé bæði miðlungserfið og erfið í 60 mínútur daglega. Mikilvægt er að foreldrar hvetji börn sín til þátttöku í fjölbreytri hreyfingu eða íþróttum þar sem barnið nýtur sín og hefur ánægju af. Einnig geta foreldrar haft jákvæð áhrif á börn sín með því að stunda sjálf reglubunda hreyfingu. Þannig geta þeir aukið líkurnar á því að börn þeirra tileinki sér samskonar lífsstíl sem leiðir til heilsusamlegs lífernis.

Næring: Það sama á við um hollar neysluvenjur. Það skiptir sköpum að heimili og skóli bjóði upp á holla fjölbreytta fæðu úr öllum fæðuflokkum og komi í veg fyrir neyslu óæskilegra fæðutegunda sem innihalda mikið magn af sykri, hertri fitu, salti eða öðrum aukaefnum.

Svefn: Ekki meiga foreldrar gleyma því að hvíld er afar mikilvæg fyrir heilsuna og því verður að gæta þess að svefn sé nægur. Svefn skólabarna er yfirleitt um 9-10 klukkustundir á sólarhring og er það hlutverk foreldra að leiðbeina börnum um slíkt.

Það sem skiptir mestu máli er að heilbrigður lífstíll getur dregið úr líkum á hinum ýmsu lífstílssjúkdómum eins og hjarta- og æðasjúkdómum, krabbameini, offitu, stoðkerfisvandamálum og sykursýki af tegund 2. Auk þess sem heilbrigður lífstíll er talin mjög góð forvörn og lækning gegn andlegum kvillum eins og þunglyndi, kvíða og streitu.
Þegar heilsuhvetjandi lífsvenjur einkenna líf okkar og við höfum tamið okkur reglubundna hreyfingu, æskilega og holla næringu og nægan svefn eða hvíld sem hluta af okkar daglega lífi, þá fyrst getum við talað um að við stundum heilsusamlegt líferni eða heilbrigðan lífsstíl.
Með heilbrigðum lífsstíl aukum við líkurnar á að lifa lengur, heilbrigðara og hamingjuríkara lifi.

Bestu kveðjur,
Andrés Þórarinn Eyjólfsson
M.S nemi í íþrótta- og heilsufræðum og
Rekstraraðili Íþróttaskólans - Stubbaakademíunnar